جميع الاسئلة الموسومة بـ استفزار سلوك عنيف عصبية إرهاب نفسي تحدي

السلام عليكم نبدأ بابنى الاكبر 7 سنوات أولا : مش بيبطل خناق مع أخوهالأصغر 5 سنوات ثانيا : عصبى جدا مثلى تماما و لما بطلب منه طلب و يحس انى بفرض عليه رأيى يتنرفز و يتعصب و ممكن يكسر البيت على دماغى بيتشنج و يهددنى بضرب اخوه ... طبعا بطلع له كارت ارهاب عالطول ثالثا : كياد يحب يغيظ الناس بالى مش عندهم .. مثلا يقول لصحبته أنا جبت الفول مارك و انت جبتى 3 من 15 رابعا : بيحول اللى قدامه لأنسان مختل عقليا يعنى مرة مدرسة العربى رمت له حاجاته من الشباك و مرة قعدت تجرى وراه فى الفصل و تتطلع على الدسكات رغم أنها 40 سنة . خامسا : أنانى جدا عايز يكوش على كل حاجة لنفسه لكن مش بيخرب حاجة غيره . سادسا : نتيجة الارهاب اللى انا عملهوله بالضرب اللى قرب يوصل لدرجة العاهات المستديمة بلاقيه بتفزع من اى حاجة ابسط غلطة تلاقيه وشه اصفر و اتخض كأنه ارتكب جناية سابعا : جسمه ضعيف جدا و مش بيتغذى كويس . ثامنا مهرج و غاوى يستظرف و يعيش فى دور المهرج اللى بيضحك الفصل و ده بيعصب المدرسين و بعض زملائه ده غير انه احيانا بيغير فى الكلام يعنى مثلا عايز الايجامة قصده البيجامة و مطلوب مننا نفهم الهندى بتاعه . تاسعا : عنده قدرة رهيبة على الالتزام بكل التصرفات اللى تعصبك و يستمتع بضيقك بمنتهى السادية . عاشرا : عايز يفضل يتكلم ليل و نهار و المدرسة بتشكى منه عايز هو اللى يسال و يجاوب و يعمل كل حاجة و مش بيبطل تنطيط و حركة و كلام و مناكفة فى زملائه . 11 - يكره الهدوء و السلام نبقى قاعدين فى امان الله لغاية لما يجى من المدرسة تلاقى البيت اتكهرب و كل اللى فى البيت عمالين يزعقوا و يصرخوا . حاجات كثير انا مدربة تنمية بشرية و بساعد ناس كثير و ناحجة لكن لما بشوفه قدامى بيركبنى ميت عفريت و بتعصب و بفقد السيطرة على نفسى و اعتقد ان مهدئات الدنيا مش ممكن تاثر فيا . معتقدش ان عنده فرط نشاط هو عنده فرط استفزار و قلة دم وعدم شعور بالأخرين . انا قريت كتب كثير فى التربية و عارفة الحل النظرى بس فعلا مشكلتى انه بيخرجنى عن شعورى بمجرد ما اشوفة ....